Fjölbrautaskóli Vesturlands

Nám til stúdentsprófs er skipulagt sem undirbúningur að námi á háskólastigi. Stúdentsprófið eitt og sér tryggir þó ekki aðgang að öllu námi á háskólastigi, hvorki hér á landi né í öðrum löndum. Einstakir háskólar eða háskóladeildir setja ýmsar sérkröfur sem nemendur þurfa einnig að uppfylla og í sumum tilvikum þurfa nemendur að gangast undir inntökupróf, t.d. í læknadeild og þeir sem sækja um listaháskóla þurfa oft að skila  möppu með verkum sínum. Nauðsynlegt er fyrir nemendur sem stefna að inngöngu í tiltekinn skóla á háskólastigi að afla sér áreiðanlegra upplýsinga um þær kröfur sem viðkomandi skóli gerir um undirbúning.

Nýju framhaldsskólalögin kveða svo á að í kjarna á stúdentsprófsbrautum séu 45 nýjar einingar í íslensku, ensku og stærðfræði. Skólar og nemendur ráða að öðru leyti miklu um hvaða greinar er boðið upp á. Auglýst verður sérstaklega ef einhver skóli býður upp á nám með nýju skipulagi.

Brautin veitir m.a. undirstöðuþekkingu í stærðfræði og eðlisfræði og beitingu stærðfræði í eðlisvísindum. Námsbrautin er fyrst og fremst undirbúningur náms tækni- og raungreinum á háskólastigi. Þessi braut er ætluð þeim er lokið hafa iðnnámi eða hliðstæðu almennu námi.

Brautskráningarskilyrði eru að viðkomandi hafi lokið verkskólum og/eða hafi starfsreynslu sem jafna má til þess sem venjulega fæst í iðnnámi, þó að undanskildu sveinsprófi og beinum undirbúningi þess. Þetta tekur einnig til starfssviða þar sem lögbundnar iðngreinar eru ekki fyrir hendi. Brautinni lýkur með tæknistúdentsprófi.

Meðalnámstími er 4 annir að loknu iðnnámi eða hliðstæðu almennu námi.