Starfsnám

Starfsnám er mjög fjölbreytt hvað varðar skipulag, umfang og inntak. Námið er oftast verklegt og bóklegt og fer fram í skóla og á vinnustað. Námstími er mislangur, allt frá einni önn upp í fjögur ár. Námið getur leitt til tiltekinna starfsréttinda sem eru lögvernduð, eða veita undirbúning og þjálfun fyrir tiltekin störf án þess að um lögvernduð starfsréttindi sé að ræða. Hér á eftir má lesa lýsingar á starfsnámi, markmiðum þess og lengd námsins. Gagnlegar upplýsingar má finna á vef menntamálaráðuneytisins og vef Iðunnar fræðsluseturs.

Markmiðið með náminu er að veita fræðslu um undirstöðuatriði í byggingu garða og grænna svæða og viðhaldi þeirra. Kennd er grasafræði, plöntuþekking, jarðrækt og landmælingar. Í skrúðgarðyrkju er og fjallað um nýframkvæmdir, s.s. hellulagnir, hleðslur, tröppugerð, sáningar og plöntun í gróðurbeð sem og umhirðu grænna svæða. Nemendur fá innsýn í rekstur skrúðgarðyrkjufyrirtækja og félagskerfi garðyrkjunnar er kynnt. Garðyrkjufræðingar af skrúðgarðyrkjubraut öðlast rétt til að gangast undir sveinspróf í faginu að loknu bók- og verknámi.

Vinna við nýframkvæmdir og viðhald grænna svæða er starfsvettvangur garðyrkjufræðinga af skrúðgarðyrkjubraut.

Skrúðgarðyrkjufræðingar starfa hjá skrúðgarðyrkjumeisturum, bæjar- og sveitarfélögum, fyrirtækjum og stofnunum. Þeir vinna einnig sem sjálfstætt starfandi skrúðgarðyrkjumeistarar (að loknu meistaranámi) og sem garðyrkjustjórar hjá bæjar- og sveitarfélögum, fyrirtækjum og stofnunum. Námið nýtist vel sem undirbúningur að háskólanámi í umhverfisskipulagi og landslagsarkitektúr.