Starfsnám

Starfsnám er mjög fjölbreytt hvað varðar skipulag, umfang og inntak. Námið er oftast verklegt og bóklegt og fer fram í skóla og á vinnustað. Námstími er mislangur, allt frá einni önn upp í fjögur ár. Námið getur leitt til tiltekinna starfsréttinda sem eru lögvernduð, eða veita undirbúning og þjálfun fyrir tiltekin störf án þess að um lögvernduð starfsréttindi sé að ræða. Hér á eftir má lesa lýsingar á starfsnámi, markmiðum þess og lengd námsins. Gagnlegar upplýsingar má finna á vef menntamálaráðuneytisins og vef Iðunnar fræðsluseturs.

Markmið námsins er að gera nemendum kleift að öðlast þekkingu og færni til að sinna störfum við hönnun, gerð og viðhald stærri og minni vefja hjá fyrirtækjum og stofnunum sem þurfa að kynna sig og starfsemi sína á vettvangi upplýsingasamfélagsins. Meðalnámstími er þrjú ár að meðtöldu grunnnámi upplýsinga- og fjölmiðlagreina, þ.e. fjórar annir í skóla og 48 vikna starfsþjálfun.