Starfsnám

Starfsnám er mjög fjölbreytt hvað varðar skipulag, umfang og inntak. Námið er oftast verklegt og bóklegt og fer fram í skóla og á vinnustað. Námstími er mislangur, allt frá einni önn upp í fjögur ár. Námið getur leitt til tiltekinna starfsréttinda sem eru lögvernduð, eða veita undirbúning og þjálfun fyrir tiltekin störf án þess að um lögvernduð starfsréttindi sé að ræða. Hér á eftir má lesa lýsingar á starfsnámi, markmiðum þess og lengd námsins. Gagnlegar upplýsingar má finna á vef menntamálaráðuneytisins og vef Iðunnar fræðsluseturs.

Löggilt iðngrein. Markmið námsins  er að gera nemendum kleift að öðlast þekkingu og færni sem krafist er til að takast á við störf rafvirkja, einkum við lagningu raflagna, uppsetningu og tengingu rafbúnaðar, mælingar, eftirlit, viðhald og viðgerðir á rafbúnaði. Meðalnámstími er fjögur ár að meðtöldu grunnámi rafiðngreina og náminu lýkur með sveinsprófi. Hægt er að velja um tvær námsleiðir, verknámsleið, samtals sjö annir í skóla og 24 vikna starfsþjálfun, eða samningsbundið iðnnám, samtals sex annir í skóla og 48 vikna starfsþjálfun.